Jab Main Sharam Se Laal Huyee
 
Jab Main Sharam Se Laal Huyee ...
Mere pati UP police mein the, aur hum log bareilly mein posted the. Hum logo ko bada sa police quarter mila hua tha. Jisme main, mere pati aur humaare do bacche rehte the. Mere baccho ki umar us samay 4 saal (ladka) aur 6 saal (ladki) thi. Hum logo ke hi bagal wale ghar mein ek aur family thi, wo bhi mere pati ke saath UP Police mein the. Hum logo ka ek doosre ke ghar aana jaana, ek saath khana peena chalta rehta tha.

Aise hi ek baar humaare padoos ke bhaisaheb ke ghar unki mausi ke ladke ka aana hua. Wo ladka shayad college mein tha. Dekhne mein sundar, baat karne me sushil aur hasne hasaane wala tha. Wo shayad 6-7 din ke liyea Bareilly unke paas aaya tha. Ab bhabhi ji ne uska hum logo se parichay karwaya. To, kabhi wo humaare ghar per jab kabhi uski pasand ka khana banta aa jata. Humein bhi accha lagta. Mujhe bhi wo bhabhi ji keh kar aur main use Devar ji keh kar bulaate.

Hum logo ka ek dever bhabhi wala rishta tha, Ek parivaarik rishta jise kahte hain. Hum logo ke yahaan ek kutiyea (female dog) bhi thi, jo pregnent thi. Ek raat usne 4 baccho ko janm diya. Aur agle din subeh ki thandi mein humaare orderly (police mein helper) ne us kutiya aur uske baccho ko bahar dhoop mein rakh diya. Us din mere bacche bhi ghar per the aur main ghar mein gobhi ke parathe bana rahi thi ki, doosre ghar se devar ji ki awaaj aayee. Bhabhi ji kya gobhi ke parathe bana rahi ho? Maine kaha haan. Dever ji bole bhabhi ji wo mere bhi pasand ke hain, main bhi aa raha hoon.

Thodi der mein wo humaare aangan mein dhoop mein baccho, kutiya aur uske baccho ke saath baithe the. Main unke liyea gobhi ke parathe tayaar kar, sabhi to garam garam parathe khila rahi thi. Nashta karne ke baad hum sabhi log moode per baith gaye ki, mere chote ladke ne mujhse poocha, mammi is kutiya ne ye bacche kaise diye? uska itna poochna, aur phir dever ji se meri nazro ka milna, mare ander sharam paida kar raha tha, aur main sharam ke maare kuch nahi keh pa rahi thi. Aur mujhe aisa laga mano main to jaise sharam ke maare laal ho gayee thi.

Tabhi dever ji ne baat ko sambhala aur bole, beta kal raat ko jab aap so gaye the, tab ek pari aaye, aur yeh bacche is kutiyea ke paas rakhkar chali gayee. Dever ji ka jawaab sunne ke baad mujhe shanti padi. Lekin us din main dever ji se aankh nahi mila payee.


Spicy Chapters...