Najre Uthi Izhaar hua Bus Mein ...
Baat 1990 ki hai, jab main college mein 1st year mein apni padhai kar raha tha. Maine college mein NCC bhi join kar li thi. Apne shararti swabhaav, apni adakaari aur apni awaaz ke jaadu se main NCC aur college mein bahaut prasidh (famous) tha. NCC main kisi bhi kaam ko karne mein hum paach logo ka group sabse aage rehta tha. Aur yahi ek karan tha ki, har kaam mein sabse pehle mujhe hi prathmikta (Preference) di jaati thi.

Ek baar hamara ek din ka NCC shooting camp laga, jisme hume apne shahr se Roorkee jana tha. Hum cadets subeh 6 baje Roorkee ke liye rawana hue aur shooting range per 8 baje ektatrit hue. Hum cadets ko alag-alag terah ki rifles jisme Light Machine Gun (LMG), Medium Machine Gun (MMG), Self Loading Rifle (SLR), Pistal .32 bore aur machine gun shooting ke liye di gayee. Humaare JCOs ne hume alag- alag terah se guns ko chalaane ki training di. Jo har kisi ko acchi lagi.

Lekin humme se kuch NCC cadets ka to kandha (shoulder) Light Machine Gun chalaane se chil gaya. Unka kandha laal pad gaya tha, phir unhe prathmik chikitsa (First Aid) di gayee, aur unhe shoothing range se bahar le gaye. Maine bhi us din khoob fires kiye. Machine Gun chalaane mein mujhe bahaut maja aaya. Ab shaam ke 4 baj chuke the, aur hum cadets ko apne shahr wapas aana tha. To, Roorkee bus stand se sabhi NCC cadets ek bus mein sawaar ho gaye.

Sabhi cadets ne bus mein apni apni seat le li. Main sabse baad mein chada, to dekhta hoon ki poori bus mein ek hi seat khaali thi, jisper do log baith sakte the. Lekin wahaan us per ek ladki baithi huayee thi. Koi bhi cadet us ladki ke paas nahi baitha. Main aaya aur us ladki ke baaju mein baith gaya. Wo ladki apne biology ke notes padh rahi thi. Maine bhi Biology 10th tak padhi hai, isliyea aaj mujhe uski kitaab mein dekhkar padhna accha laga raha tha. Mujhe uski likhawat (hand writing) bahaut acchee lagee. Aur ab hum dono uske notes padh rahe the.

Aaju baaju kya chal raha tha, mujhe kuch nahi pata. Saare cadets meri majaak bana rahe the (jo mujhe baad mein mere dosto ne bataya). Conductor aaya aur usne ticket ke liyea kaha lekin main us ladki ke notes mein itna masgool tha ki, mujhe kuch pata hi nahi chala. Phir us ladki ne mere kandhe per haath rakhkar conductor ki aur ishara karke ticket lene ko kaha.

Maine abhi tak us ladki ka chahra nahi dekha tha, Uske kandhe per haath rakhte hi, meri najre uski najro se takrayee, maine sorry keh kar ijhaar kiya aur phir bus ka ticket katwa liya. Ab maine us ladki se poocha ki wo kya karti hai? Usne bataya ki, wo Meerut University mein Biology ki student hai. Phir hum dono kuch samay tak baat karte rahe. Wo ladki dekne mein sundar nahi thi lekin acchee thi. Mera shahr aane wala tha. Aur ab mera usse vidai lene ka samay bhi najdeek aa raha tha. Maine use ek kagaj per apna pata (home address) diya, Jawaab mein usne bhi mujhe apne Meerut girls hostel ka pata de diya.

Hum logo ka kuch samay tak patrachaar chalta raha. Lekin kuch samay ke baad wo bhi band ho gaya, aur meri apni zindagi ki kitaab mein ek aur adhayay judh gaya.


Spicy Chapters...